රාත්‍රී අඳුර පොළව වෙලාගෙන අවසන්ය. එක් පසෙකින් ගමන් වෙහෙසය තවත් පසෙකින් කුස ගින්නය. සියල්ලටම වඩා මෙතරම් දුරක් පැමිණි ව්‍යාපාර කටයුත්ත සාර්ථක නොවීමෙන් ඇතිවූ කේන්තියය.
සාර්ථක වේයැයි ඉඟියක්වත් නොවූ කටයුත්තක් වෙනුවෙන් මෙතරම් දුරක් පැමිණීම පිළිබඳව මටම සිතෙන් ශාප කරගනිමින් සිටි නිසාදෝ මෝටර් රථයේ වේගය වැඩිවන බවක් මා හට නොදැනුනි.
සාමාන්‍යෙන් කාර්‍යබහුල නගරයක් සේ සැළකෙන දෙල්ගොඩ නගරය පසුකරමින් සිටියත් මාගේ පිංමහිමයටදෝ කුසට යමක් දමාගැනීමට තරම් ප්‍රිය ස්ථානයක් මාගේ ඇස නොගැටුනි. කුසගින්න තවත් අධික වූ නිසා මා නොදැනුවත්වම වාහනයේ වේගය වැඩිවන්නට වූයේ ගමනාන්තය ඉක්මනින් දැකීමේ අරමුණෙනි. වාසනාවට දරණගම හංදියේ පිළිවෙලක් ඇති අවන්හලක් ඇස ගැටුනේ මගේ කුසගින්නට සහනයක් දෙමිනි.
ඇණවුම් කල ඌරු මස් කොත්තුව සැබවින්ම රසවත්වූ නිසාම ඉක්මනින් අවසන් වූයේ මාගේ කුස ගින්න නිවා දමමිනි. නරක පුරුද්දක් උවද දුම් දමමින් ගෙනා තේ කෝප්පයද පානය කිරීමෙන් පසු ගතට කෙසේ වෙතත් සිතට දැනුන ප්‍රබෝධයත් සමඟ ඉක්මනින් නිවසට යා හැකි බව මා හට විස්වාසය.
නැවත ගමන් ඇරඹූ මෝටර් රථය මාදරාව වෙල්යාය පසුකරන විට ඇරදමා ඇති පැති වීදුරු අතරින් එතුලට අනාරාධිතව කඩා වඳින සුළං රැල්ල දෙබෑකරගෙන ඉදිරියට ඇදෙන්නේ දඟකාර කොලු ගැටයෙකු මෙනි.
හෙට්ටියාගම හංදිය පෙනෙන තෙක්මානයේ, වමතින් තඩි ගමන් මල්ලකුත් සුරතින් කුඩා දරුවෙකුත් ගත් කාන්තාවක් ඉතාම අපහසුවෙන් ගමන් කරණු මාගේ නෙත ගැටිනි. දකුණු කකුල ගස්සමින් වම් කකුලට බරදී ඇවිදින ඇයගේ ගමන් විලාසයට හේතුව ඇයගේ ගමන් මල්ල බව පැහැදිලිය.
මා ඇයව පසුකර මදක් ඉදිරියට ගොස් වාහනය නතර කලෙමි.
"ඉස්සරහටද යන්නෙ?"
"අනේ ඔව් අයියේ, යන්න ඕන නම් කිරිබත්ගොඩට."
"ආ මම යන්නෙත් කිරිබත්ගොඩ හරහා, නඟින්න මම ඔයාව කිරිබත්ගොඩින් දාන්නම්,"
රාත්‍රී අඳුර සමඟ පොරබඳමින් මහ පාරක අතරමංව විටි ඇයට මාගේ විනීත ආරාධනය ඉවත දැමීමට කිසිඳු උවමනාවක් නැතුවා මෙන් ඇය කලේ පසුපස අසුනට බර දීමය. කළු පැහැති දිගු ෆ්ලෙයාඩ් සායට කහ පැහැති බ්ලවුසයක් ඇඳි ඇය සැබවින්ම රූමත්ය. අවුරුදු විසිහයක විසිහතක පෙනුමක් ඇති ඇය අත රැඳි දරුවා මාස හයක පමණ බිළිඳියකි.
මෝටර් රථයේ ඉදිරිපස කණ්නාඩියෙන් පෙනෙන ඇගේ රුව දුටුවන් සිත් ඇඳ බැඳ ගන්නා තරම් ආකර්ශණීයය. පසුපස අසුනේ මැදට වෙන්නට වාඩිවී සිටි ඈ නිරික්ෂනාත්මක බැල්මක් මුළු මෝටර් රථය පුරා යවමිනි. නන්නාදුනන පිරිමියෙකු සමඟ ගමන් කරන රූමත් තැනැත්තියක ලෙස ඇයගේ හැසිරීම සාමාන්‍යය.
"මෙච්චර රෑ වෙලා, නංගි ගමනක්ද?"
"ඔව් අයියෙ, මම මේ කිරිබත්ගොඩින් නුවර බස් එක අල්ල ගන්න කියලා."
"මේ මහ රෑ??"
"ජීවිත වලට කරදර එන්නෙ රෑ දවල් බල බල නෙමෙයිනෙ අයියෙ."
එතනින් එහාට කිසිවක් හාර ඇවිස්සීමට හිත නොදුන්නේ ඇය මා ගැන වැරදියට සිතාවි යැයි හැඟුන නිසාය.
කිරිඟරුඩෙන් නෙළු පිළිමයක් මෙන් ඇගේ මුහුණ සැබවින්ම සරාගීය. කිසිඳු ආටෝපයකින් තොර ඈ තුල ඇත්තේ ස්වාභාවික ලස්සනකි. මෙවන් යුවතියක රෑ ජාමේ මෙලෙස තනි පන්ගලමේ ගමන් කිරීම අනතුරු වලට බලෙන් අත වැනීමකි. රස්තියාදු කාරයන් මෙන්ම විවිධ මානසික මට්ටම් වල අය බහුල සමාජයකය අප ජීවත් වන්නෙ.
මාගේ චිත්ත සන්තානය තුල ඈ පිළිබඳව නැඟී එන දහසකුත් එකක් සිතුවිලි සමුදාය සුනු විසණුවී ගියේ පසුපස බලන කණ්නාඩියෙන් මා දුටු දසුනෙනි.
ඇය කිසිදු බයක් හෝ සැකයකින් තොරව තම දරුවාට කිරි දෙමින් සිටී. ඇගේ පයෝදරයන් අනවශ්‍ය තරමට නිරාවරණය කරගෙන සිටින අතර ඇයද කණ්නාඩියෙන් එක එල්ලේ මා දෙස බලා සිටී. මම වහාම අහක බලා ගන්නා අතරම කණ්නාඩිය වෙනත් පසෙකට හැරවූයේ දරුවෙකුට කිරිදෙන මවක දෙස කාමුක ඇසින් බැලීම නොහොබිනා නිසාය.
වාහනයේ වේගයට සමානුපාතිකව මාගේ හදවතේ වේගයද වැඩිවෙමින් පවතී. පාදවල මහපට ඇඟිලි වලින් පටන් ගන්නා සීතලක් ඇඟපුරා ගමන් කරමින් ඇත. කියාගත නොහැකි නිහඬ ගුප්ත පරිසරයක අප අතරමං වූවා වැනිය. කිරිබත්ගොඩ ආසන්න වන විට කණ්නාඩිය නැවත සකසා ඈ දෙස බැලුවේ ඇය බසිනා තැන අසා ගැනීමටය.
ඒ වන විටත් ඈ කණ්නාඩිය තුලින් මා දෙස එක එල්ලේ බලා සිටී. වාහනයට ගොඩ වන විට පුහුආටෝප වලින් තොරවූ ඇගේ සිහින් දෙතොල මේ වනවිට රත් පැහැයෙන් දිලිසේ. ඇය තොල් ආලේපන ගෑවේ කුමන මොහොතකදැයි ගැටළුවෙන් සිත අතරමංව සිටි මොහොතේ මා දුටුවේ ඇගේ මුවේ වම් පසින් දියරමය යමක් වෑහෙන බවය. නැවත වරක් මා ඈ දෙස ඉතා උවමනාවෙන් බැලුවේ සැක සංකා දුරු කර ගැනීම පිණිසය.
අහෝ මා දකින්නේ කුමක්ද? ඇය ඈගේ බිළිඳිය අනුබව කරමින් සිටී. දරු පැටියා හරහට අල්ලා සිටින ඈ බිළිඳියගේ ගෙලින් කොටසක් කඩා ගන්නේ මුව දෙපසින් ලේ වැක්කෙරෙත්දීය.
කිසිවක් සිතාගත නොහැකිව අසරණ වූ මා වාහනය ඉදිරියට හැසිරවූයේ දෑස් පියාගෙන මෙන්‍ය. අධික වේගයෙන් පැමිණ කිරිබත්ගොඩ පොලීසියට ඇතුළු කර වාහනය නවතා දැමූ මා සුක්කානම මතම හිස තබා ගත්තේ පොලිස් නිළධාරින් කිහිප දෙනෙකු වාහන දෙසට දිව එත්දීය.
"කාර් එක මාර ඒමක්නෙ ආවෙ?"
"වාහනේ ඇතුල නම් මාර සීතලයි."
"මේ මනුස්සයගෙ බෙල්ල තුවාල උනේ කොහොමද දන්නෑ. බෙල්ලෙ පැත්තක්ම නෑනෙ."
ගෙලින් රුධිරය වෑහෙන මාගේ නිසල සිරුර වටකරගෙන සිටින පොලිස් නිළධාරින් අතර ඇති වන කතාබහ මා අසා සිටියේ පොලීසියට ඉහල ආකාසයේ සිටය.
✍️ ප්‍රියා.© 20/02/2025
